Isa 24 | NdeIBE | STEP | Khangela, uJehova uzadiliza umhlaba awutshabalalise; uzawuchitha ahlakaze abahlala kuwo

Isaiah 24

Ukuchithwa Komhlaba NguJehova

1 Khangela, uJehova uzadiliza umhlaba awutshabalalise; uzawuchitha ahlakaze abahlala kuwo

2 kuzafanana kumphristi njengasebantwini, enkosini njengakusisebenzi, enkosikazini njengakuncekukazi, kumthengisi njengakumthengi, kowebolekayo njengakumebolekisi, lokweledayo njengakokweledisayo.

3 Umhlaba uzatshabalaliswa nya uphangwe uqedwe du. UJehova usekhulumile ilizwi leli.

4 Umhlaba uyoma ubune, umhlaba uyahodoza ubune, abaphakemeyo bomhlaba bayahodoza!

5 Umhlaba ungcoliswa ngabantu bawo. kabayilalelanga imithetho, beqe imilayo bephula isivumelwano esingapheliyo.

6 Ngakho-ke umhlaba uchithwa yisiqalekiso; abantu bawo kumele bahlupheke ngenxa yokona kwabo. Ngakho abantu abahlala emhlabeni bayatshiswa, njalo balutshwana kakhulu abaseleyo.

7 Iwayini elitsha liyaphela, amavini ayabuna; bonke abenza umsindo bejabula bayabubula.

8 Ukukhala kwamagedla kuthulisiwe, umsindo wabajabulayo usuphelile, ichacho lentokozo selithule.

9 Kabasanathi iwayini behlabela, utshwala buyababa kubanathi babo.

10 Idolobho elidilikileyo litshabalele; iminyango yezindlu zonke ivalekile.

11 Emigwaqweni bakhalela iwayini, yonke intokozo iba yikudana, ukujabula konke kuphelile emhlabeni.

12 Idolobho lisele selingamanxiwa, isango lalo libhidlizwe laba yizicucu.

13 Kuzakuba njalo emhlabeni laphakathi kwezizwe, njengalapho isihlahla som-oliva sinyikinywa, loba njengezithelo ezitholwa emva kokuvunwa kwamavini.

14 Baphakamisa amazwi abo, bahlabele ngentokozo; bememezela ubukhosi bukaJehova bengasentshonalanga.

15 Ngakho-ke dumisani uJehova uNkulunkulu ka-Israyeli, ezihlengeni zolwandle.

16 Sizwa ukuhlabelela okuvela emikhawulweni yomhlaba: “Udumo kalube koLungileyo.” Kodwa mina ngathi, “Ngiyacikizeka, ngiyacikizeka! Maye mina! Abakhohlisi bayaceba! Ngenkohliso abakhohlisi bayaceba!”

17 Ukwesaba, igodi lomjibila kulilindele, lina bantu basemhlabeni.

18 Loba ngubani obalekela umsindo wokwesaba uzawela egodini; loba ngubani ophumayo egodini uzabanjwa ngumjibila. Amasango asezulwini avuliwe, izisekelo zomhlaba ziyanyikinyeka.

19 Umhlaba usubhidlikile, umhlaba usudabuke phakathi, umhlaba usunyikinywe impela.

20 Umhlaba udiyazela njengesidakwa, uzunguzeka njengendlu kulesiphepho; siwusinda kangaka isono sokuhlamuka kwawo uze uwe – awuyi kuvuka futhi.

21 Ngalolosuku uJehova uzawajezisa amandla asemazulwini phezulu lamakhosi emhlabeni ngaphansi.

22 Bazabuthelwa ndawonye njengezibotshwa zibotshiwe emgodini oyintolongo. Bazavalelwa entolongweni bajeziswe emva kwezinsuku ezinengi.

23 Inyanga izayangeka, ilanga libe lenhloni; ngoba uJehova uSomandla uzabusa ngenkazimulo phezu kweNtaba iZiyoni laphakathi kweJerusalema, laphambi kwabadala bakhona.